Stofnun stjórnmálasambands við Fidjieyjar

Fastafulltrúar Íslands og Fidjieyja hjá Sameinuðu þjóðunum, Hjálmar W. Hannesson sendiherra og Mason F. Smith sendiráðunautur, undirrituðu yfirlýsingu um stofnun stjórnmálasambands ríkjanna í New York, föstudaginn 8. febrúar sl. Fastafulltrúarnir ræddu á fundi sínum möguleika á samstarfi ríkjanna, fyrst og fremst á sviði sjávarútvegs.

Fijieyjar eru í Kyrrahafinu og voru bresk nýlenda fram til 1970. Tæplega milljón íbúar byggja um 110 eyjar af þeim 332 sem ríkinu tilheyra, en samtals eru þær ríflega 18 þúsund ferkílómetrar. Herforingjastjórn hefur verið þar við völd frá því í desember 2006 en stefnt er að því að haldnar verði lýðræðislegar kosningar í landinu í mars 2009.