Nr. 4/2008 - Loðnuveiðar stöðvaðar

Fréttatilkynning frá sjávarútvegs- og landbúnaðarráðuneyti

Loðnuveiðar stöðvaðar

Sjávarútvegs- og landbúnaðarráðherra hefur ákveðið að stöðva loðnuveiðar á yfirstandandi vertíð frá kl. 12 á hádegi, fimmtudaginn 21. febrúar 2008. Þetta er gert að tillögu Hafrannsóknastofnunarinnar en á grundvelli mælinga undanfarið er mat á stærð veiðistofns loðnu á bilinu 200-270 þúsund tonn. Stærð stofnsins er því langt undir því sem gildandi aflaregla gerir ráð fyrir að skilið sé eftir til hrygningar.

Áhersla er lögð á að veiðisvæði verði vaktað áfram. Það gera veiðiskip til að byrja með og í framhaldinu skip Hafrannsóknastofnunarinnar, enda er ekki útilokað að meiri loðna finnist og veiðar geti hafist að nýju.

Reykjavík 20. febrúar 2008