Uppgjör verðbréfaviðskipta í erlendri mynt

Nefnd, sem haft hefur til skoðunar lagaákvæði er varða uppgjör viðskipta með íslensk verðbréf sem skráð eru í erlendri mynt, hefur lokið störfum og skilað skýrslu til viðskiptaráðherra. Nefndin telur brýnt að eyða óvissu um það hvaða reglur gildi um uppgjör slíkra viðskipta og leggur til breytingar á gildandi lögum um rafræna eignarskráningu verðbréfa nr. 131/1997. Jón Sigurðsson, fyrrverandi ráðherra og bankastjóri var formaður nefndarinnar.

Breytingatillögurnar miðast að því að greiða götu viðskipta með verðbréf í erlendri mynt en um leið tryggja að ströngustu íslenskar og alþjóðlegar körfur um öryggi greiðslufyrirmæla og greiðslukerfa sé uppfyllt.

Lagt er til að heimilað verði að Verðbréfaskráning Íslands hf., eða sambærilegir aðilar, geti annast uppgjör í erlendri mynt í samstarfi við endanlegan bakhjarl sem hafi öruggan aðgang að fjármunum í skráningargjaldmiðlinum. Litið er til þeirrar tilhögunar sem sænska verðbréfamiðstöðin hefur komið á með samningi við Finnlandsbanka til þess að tryggja fullnaðaruppgjör á sænskum verðbréfum sem skráð eru í evrum.

Að svo stöddu eru ekki lagðar til breytingar á efndalokum rafrænna verðbréfa í íslenskum krónum. Nefndin mælir þó með því að viðskiptaráðherra efni sem fyrst til endurskoðunar á öllum íslenskum laga- og reglugerðarákvæðum sem snerta uppgjör verðbréfaviðskipta, hver sem viðskiptamyntin er, með það fyrir augum að einfalda slík ákvæði í takt við tæknibreytingar og alþjóðavæðingu viðskipta.

Viðskiptaráðherra hefur kynnt efni skýrslunnar fyrir ríkisstjórn og drög að frumvarpi hefur verið sent til þingflokka ríkisstjórnarflokkanna til afgreiðslu.

Skýrslu nefndarinnar má nálgast hér