Þróun mannfjölda á ellilífeyrisaldri

Úr Vefriti fjármálaráðuneytisins 6. mars 2008 - þú getur gerst áskrifandi að vefritinu.

Nýverið gaf Hagstofa Íslands út nýja spá um mannfjölda á Íslandi til ársins 2050.

Í því samhengi er áhugavert að skoða þróun mannfjölda þeirra sem eru ellilífeyrisaldri þ.e. 67 ára og eldri. Á Íslandi er fjöldi 67 ára og eldri nú um 32 þúsund manns, sem er rúmlega 10% af heildarmannfjöldanum.

Áætlað er fjöldinn í þessum aldurshópi verði orðinn tæplega 82 þúsund árið 2050 eða um 19% af heildarmannfjölda á Íslandi. Gert ráð fyrir því að ævilengd muni aukast talsvert. Í dag er meðalævilengd kvenna 82,8 ár og 78,9 ár hjá körlum en á árinu 2050 er reiknað með að meðalævilengd kvenna verði orðin 87,1 ár og 84,6 ár hjá körlum. Á móti er gert ráð fyrir því að fæðingartíðni muni standa í stað og jafnvel minnka. Með þessu móti verður þjóðin hlutfallslega eldri. Myndin sýnir þróun mannfjölda 67 ára og eldri fram til ársins 2050.

Heimild: Hagstofa Íslands

Reikna má með því að ellilífeyrisútgjöld almannatrygginga aukist af þessum sökum en það fer þó eftir þróun viðmiðunartekna og uppsöfnun lífeyrisréttinda landsmanna. Ísland hefur þá sérstöðu að lífeyrissjóðirnir munu í vaxandi mæli standa undir lífeyri ellilífeyrisþega.

Reikna má með að útgjöld ríkissjóðs til heilbrigðisþjónustu aukist með auknum fjölda 67 ára og eldri en þó einkum þegar tekur að fjölga umtalsvert í hópi þeirra sem eru áttræðir og eldri. Reglulega eru endurskoðaðir þættir í heilbrigðiskerfinu og almannatryggingum. Í því samhengi verður að hafa það í huga hvort framtíðarkynslóðir muni standa undir væntanlegum auknum útgjöldum sem stafa af því að þjóðin er hlutfallslega að eldast.