Siðareglur vegna umfjöllunar um innflytjendur

Jóhanna Sigurðardóttir, félags- og tryggingamálaráðherra, ávarpaði föstudaginn 18. apríl 2008 ráðstefnuna: Hinn grunaði er útlendingur! - Umfjöllun fjölmiðla um innflytjendur og afbrot.

Jóhanna Sigurðardóttir, félags- og tryggingamálaráðherra, ávarpaði á föstudaginn, 18. apríl 2008, ráðstefnuna Hinn grunaði er útlendingur. Ráðstefnan er samstarfsverkefni félags- og tryggingamálaráðuneytis, Alþjóðahúss, Kópavogsbæjar, Blaðamannafélags Íslands, Fjölmenningarsetursins og lögreglunnar á höfuðborgarsvæðinu. Umræðuefni ráðstefnunnar var afbrot innflytjenda og umfjöllun fjölmiðla.

Í ávarpi sínu sagði ráðherra meðal annars:

„Fjölmiðlar eiga að endurspegla samfélagið á hverjum tíma. Áhrif þeirra og völd eru mikil og þeim ber að fara vel með þetta vald. Ábyrg umfjöllun um málefni innflytjenda og aðgangur þeirra sjálfra að fjölmiðlum getur ráðið miklu um hvernig til tekst. Við höfum séð dæmi um vandaða og ábyrga umfjöllun í fjölmiðlum og því ber að fagna. Fjölmiðlar sem vilja axla ábyrgð mega ekki kynda undir alhæfingar. Ég hvet alla fjölmiðla sem ekki hafa þegar gert það að setja sér sérstakar siðareglur um efnistök þegar fjallað er um málefni innflytjenda. Það er í samræmi við áherslur í framkvæmdaáætlun í innflytjendamálum sem Alþingi hefur nú til meðferðar.“

Ávarp ráðherra á ráðstefnunni um fjölmiðla, innflytjendur og afbrot