Greiðsluafkoma ríkissjóðs janúar-júní 2008

• Greiðsluafkoma ríkissjóðs janúar-júní 2008 (PDF 62K)

Greiðsluuppgjör ríkissjóðs fyrir fyrri helming ársins 2008 liggur nú fyrir. Samkvæmt uppgjörinu er breyting á handbæru fé frá rekstri jákvæð um 27,5 milljarða króna innan ársins, sem er 4,1 milljarði lakari útkoma heldur en á sama tíma í fyrra. Tekjur reyndust um 7,5 milljörðum hærri en í fyrra á meðan að gjöldin hækka um 22,9 milljarða króna. Hreinn lánsfjárjöfnuður er jákvæður um 26 milljarða króna, sem er 66,3 milljörðum hagstæðari útkoma en á sama tíma í fyrra.

Sjóðstreymi ríkissjóðs janúar–júní 2004-2008

Innheimtar tekjur ríkissjóðs á fyrri helmingi ársins námu rúmlega 225,5 ma.kr. sem er aukning um 7,6 ma.kr. frá sama tíma árið 2007 eða um 3,5% að nafnvirði. Skatttekjur og tryggingagjöld námu 206 ma.kr. sem samsvarar 5,2% aukningu að nafnvirði á milli ára. Á sama tíma hefur almennt verðlag hækkað um 7,8% (VNV án húsnæðis) og skatttekjur og tryggingagjöld hafa því dregist saman um 2,4% að raunvirði. Aðrar rekstrartekjur námu tæplega 17 ma.kr. og jukust um 16,4% frá sama tímabili í fyrra. Þar af er mest aukning í vaxtatekjum af skammtímalánum ríkissjóðs sem skýrist m.a. af því að innistæður ríkissjóðs eru meiri nú en í fyrra og vaxtastigið er hærra. Þá var eignasala ríkissjóðs rúmlega 2 ma.kr. á fyrstu sex mánuðum ársins.

Skattar á tekjur og hagnað námu tæplega 85 ma.kr. sem er aukning um 9,6% frá sama tíma árið áður. Þar af nam tekjuskattur einstaklinga um 46 ma.kr. og jókst um 4,8% að nafnvirði á milli ára. Tekjuskattur lögaðila nam rúmlega 12,5 ma.kr. og jókst um 1,8% frá sama tíma árið áður. Skattur af fjármagnstekjum nam tæplega 26 ma.kr. og jókst um 24,5% að nafnvirði á milli ára en innheimta hans fer að langmestu leyti fram í janúar hvert ár. Innheimta eignarskatta nam rúmum 4 ma.kr. sem er samdráttur upp á 23% á milli ára. Stimpilgjöld, sem eru um 80% eignarskattanna, drógust saman um 878 milljónir króna á tímabilinu eða um 20,5%.

Innheimta almennra veltuskatta nam 92,5 ma.kr. á fyrri helmingi ársins og jókst um 2% að nafnvirði frá sama tíma árið áður en dróst hins vegar saman um 5,4% að raunvirði (miðað við hækkun vísitölu neysluverðs án húsnæðis). Þegar horft er á 6 mánaða hlaupandi meðaltal nemur raunlækkun veltuskatta nú 5,6% en innheimta almennra veltuskatta gefur ágæta mynd af þróun innlendrar eftirspurnar. Virðisaukaskattur er stærsti hluti veltuskattanna og skilaði hann ríkissjóði rúmlega 65,5 ma.kr. á tímabilinu sem er 1,3% aukning að nafnvirði frá fyrstu sex mánuðum ársins 2007 en 6% raunlækkun. Virðisaukaskattur í júnímánuði einum dróst hins vegar saman að nafnvirði um 9,4% frá júnímánuði 2007. Þá nemur raunlækkun virðisaukaskatts 3,6% þegar litið er á 6 mánaða hlaupandi meðaltal. Aðrir veltuskattar námu tæplega 27 ma.kr. frá janúar til júní, tæplega 1 ma.kr. meira en í fyrra. Þá námu tekjur vegna tolla og aðflutningsgjalda tæpum 3 ma.kr. og tekjur af tryggingagjöldum tæpum 20,5 ma.kr. sem er aukning um annars vegar 28,9% og hins vegar 3,5% á milli ára.

Greidd gjöld nema 198,3 milljörðum króna og hækka um 22,9 milljarða króna frá fyrra ári, eða um 13,1%. Mest hækkun milli ára er á liðunum efnahags- og atvinnumál 4,9 milljarðar króna eða 22,1% og munar þar mestu um 3 milljarða króna hækkun til samgöngumála á milli ára. Greiðslur til almennrar opinberrar þjónustu hækka um 4,8 milljarða króna eða 19,1% og til almannatrygginga- og velferðarmála um 4,3 milljarða króna eða 10,9%. Hlutfallslega er mest hækkun á liðnum varnarmál, en Ratsjárstofnun kemur inn sem ný stofnun undir þennan lið á þessu ári. Liðurinn Löggæsla, réttargæsla og öryggismál hækkar um 24,9% eða 2 milljarða króna og vegur þar þyngst Landhelgissjóður vegna smíði varðskips og liðurinn húsnæðis, skipulags og veitumál hækka um 19,5% milli ára og munar þar mestu um auknar fjárveitingar vegna leiguíbúða.

Lánsfjárjöfnuður ríkissjóðs er neikvæður um 7,4 milljarða króna á fyrri helmingi ársins, en var neikvæður um 74,5 milljarðar króna á sama tíma í fyrra. Hreinn lánsfjárjöfnuður nam 26 milljörðum króna janúar til júní, en var neikvæður um 40,3 milljarða króna fyrir sama tímabil á síðasta ári. Viðsnúningurinn skýrist að mestu leyti af 30,3 milljarða króna kaupum ríkissjóðs á hlut Reykjavíkurborgar og Akureyrarbæjar í Landsvirkjun og eiginfjáraukningu Seðlabanka Íslands með 44 milljarða króna eiginfjárframlagi á síðasta ári.

Tekjur ríkissjóðs janúar-júní 2006-2008

Gjöld ríkissjóðs janúar–júní 2006-2008