Umsóknir um framlög úr Framkvæmdasjóði aldraðra

Auglýst er eftir umsóknum um framlög úr Framkvæmdasjóði aldraðra árið 2009.

Framkvæmdasjóður aldraðra starfar samkvæmt ákvæðum laga um málefni aldraðra nr. 125/1999 og reglugerð um sjóðinn nr. 1033/2004. Hlutverk hans er að stuðla að uppbyggingu og efla öldrunarþjónustu um land allt. Samstarfsnefnd um málefni aldraðra fer með stjórn sjóðsins og gerir tillögur til félags- og tryggingamálaráðherra um úthlutun úr honum.

Heimilt er að veita framlag úr Framkvæmdasjóði aldraðra til eftirtalinna verkefna:

a. Bygginga þjónustumiðstöðva aldraðra og dagvista sem starfræktar eru af sveitarfélögum.

b. Bygginga dvalarheimila og sambýla.

c. Bygginga hjúkrunarheimila eða hjúkrunarrýma á öldrunarstofnunum í eigu sveitarfélaga, félagasamtaka og einkaaðila.

d. Breytinga og endurbóta á húsnæði stofnana, sbr. a–c-lið. Framlög skal miða við kostnaðaráætlun og mat á nauðsyn.

e. Annarra verkefna sem stuðla að uppbyggingu öldrunarþjónustu.

Umsóknarfrestur er til 10. janúar 2009. Umsóknum skal skila til félags- og tryggingamálaráðuneytisins, Hafnarhúsinu v/Tryggvagötu, 150 Reykjavík, á eyðublöðum sem þar fást. Eyðublöðin má einnig nálgast á vefsíðu ráðuneytisins.