Málþing um löggjöf gegn mismunun á Íslandi

Mannréttindaskrifstofa Íslands og félags- og tryggingamálaráðuneytið standa fyrir málþingi um löggjöf gegn mismunun á Íslandi 30. janúar næstkomandi í samstarfi við Fjölmenningarsetrið, Samtökin 78, Öryrkjabandalagið, Landssamtökin Þroskahjálp, Samráðsvettvang trúfélaga, Kvenréttindafélag Íslands og Alþjóðahús. Málþingið er styrkt af PROGRESS-áætlun Evrópusambandsins.

Málþingið hefst kl 12:00 með því að boðið verður upp á léttan hádegisverð í Iðnó en formleg dagskrá stendur frá kl. 13:00 til 16:00. Aðgangur er ókeypis og öllum opinn. Nánari upplýsingar er að finna á heimasíðu Mannréttindaskrifstofu Íslands: www.mannrettindi.is. Skráning tilkynnist til [email protected] fyrir 29. janúar.

Til umræðu á málþinginu verður meðal annars efni gerða Evrópusambandsins um bann við mismunun á vinnumarkaði og bann við mismunun á grundvelli kynþáttar og þá með tilliti til íslenskrar löggjafar. Enn fremur verður fjallað um nýja jafnréttislöggjöf Svía og um tilurð og hlutverk nýstofnaðs embættis umboðsmanns gegn mismunun í Svíþjóð. Þá verður tæpt á fjölþátta mismunun.

Helgi Hjörvar, alþingismaður og formaður starfshóps á vegum félags- og tryggingamálaráðuneytisins um gerðir Evrópusambandsins um bann við mismunun, mun greina frá vinnu hópsins. Anna Theódóra Gunnarsdóttir, fyrrum skrifstofustjóri lagaskrifstofu sænska umboðsmannsins gegn mismunun á grundvelli kynþáttar, nú sérfræðingur hjá nýju embætti umboðsmanns gegn mismunun, segir frá nýrri jafnréttislöggjöf Svía og hlutverki embættisins. Oddný Mjöll Arnardóttir, prófessor við Háskólann í Reykjavík fjallar um löggjöf gegn mismunun á Íslandi og mögulegar umbætur og Magnús Norðdahl, lögfræðingur Alþýðusambands Íslands, mun fjalla um viðhorf verkalýðshreyfingarinnar að því er varðar mismunun á vinnumarkaði. Að loknum erindum fara fram pallborðsumræður með þátttöku fulltrúa Samtakanna ‘78, Félags eldri borgara, Kvenréttindafélagsins, Alþjóðahúss, Öryrkjabandalagsins og Samráðsvettvangs trúarbragða.