Skýrsla um málefni fatlaðra afhent samgönguráðherra
Niðurstöður og tillögur hópsins beinast að ýmsum verkefnum sem heyra undir félagsmálaráðuneytið, umhverfisráðuneytið og samgönguráðuneytið. Hópurinn beinir því sérstaklega til samgönguráðuneytisins og stofnana þess að tryggja að aðgengismálum sé sinnt þannig að sómi sé af.
Auk Helga Hjörvars alþingismanns, sem skipaður var í starfshópinn án tilnefningar, voru í hópnum þau Erna Bára Hreinsdóttir, tilnefnd af Vegagerðinni og Jón Heiðar Jónsson, tilnefndur af Öryrkjabandalagi Íslands. Starfsmaður hópsins var Rúnar Guðjónsson, viðskiptafræðingur, í samgönguráðuneyti.
Starfshópurinn hélt 3 fundi, þann fyrsta í apríl í fyrra. Auk þess hefur hópurinn hitt ýmsa sem tengjast málaflokknum og leitað fanga úr innlendu og erlendu efni. Skýrslan var unnin í góðu samkomulagi við samtök fatlaðra á Íslandi; Öryrkjabandalagið og Þroskahjálp.
Eftir því sem vinnu hópsins vatt fram ákvað hann að rétt væri að taka tillit til fleiri sjónarmiða. Í norrænni samvinnu á vettvangi Nordiska Handikappspolitiska Radet er nú unnið að því að skapa yfirlit yfir aðgengismál á Norðurlöndum. Meðal annars verða settir fram mælikvarðar sem lýsa eiga aðstæðum. Hópurinn fjallar um þetta starf í skýrslunni.
 |
|||
| Skýrsla starfshópsins kynnt ráðherra. Frá vinstri: Róbert Marshall, aðstoðarmaður ráðherra, Kristján L. Möller samgönguráðherra, Ragnhildur Hjaltadóttir ráðuneytisstjóri, Helgi Hjörvar, alþingismaður og formaður starfshópsins, og Rúnar Guðjónsson, sérfræðingur í samgönguráðuneytinu. |