Háskóli Íslands og utanríkisráðuneytið undirrita samstarfssamning

Össur Skarphéðinsson, utanríkisráðherra, og Kristín Ingólfsdóttir, rektor Háskóla Íslands, undirrituðu í dag samstarfssamning á sviði fræðslu og rannsóknarstarfa í alþjóðamálum við Alþjóðamálastofnun Háskóla Íslands. Tilgangurinn er að styrkja samstarf og samvinnu, efla umræðu og þekkingarmyndun á sviði alþjóðamála á Íslandi og auka rannsóknarvinnu á þeim vettvangi. Enn fremur felst í samningnum skuldbinding ráðuneytisins til að ráða tvo starfsnema úr meistaranámi í alþjóðasamskiptum við Háskóla Íslands í þrjá mánuði yfir sumartímann. Að auki skuldbindur Alþjóðamálastofnun sig til að bjóða upp á málfundi og ráðstefnur í samstarfi við ráðuneytið.

Styrkurinn sem er tvær milljónir króna er að hluta til eyrnamerktur fundaröð Alþjóðamálastofnunar Framtíð Íslands í samfélagi þjóðanna sem er samstarfsverkefni stofnunarinnar, ráðuneytisins og allra háskóla landsins.

Við undirritunina í dag ítrekaði utanríkisráðherra mikilvægi þessa samstarfs og nefndi sérstaklega hversu miklu máli það skiptir að efla umræðu um alþjóðamál hérlendis. Rektor þakkaði ráðherranum fyrir stuðninginn og sagði samninginn afskaplega mikilvægan fyrir Alþjóðamálastofnun og háskólann allan.