Forstjóri nýrrar stofnunar
Ásta Ragnheiður Jóhannesdóttir, félags- og tryggingamálaráðherra, hefur ákveðið að skipa Huld Magnúsdóttur forstjóra Þjónustu- og þekkingarmiðstöðvar fyrir blinda, sjónskerta og daufblinda einstaklinga, til næstu fimm ára frá 1. mars næstkomandi. Alls bárust 25 umsóknir um stöðuna. Ráðningarfyrirtækið Capacent aðstoðaði félags- og tryggingamálaráðuneytið við faglega úrvinnslu og mat á hæfni umsækjenda.
Huld hefur starfað hjá Össuri hf. í 15 ár. Hún hefur langa stjórnunarreynslu að baki og undanfarin ár hefur hún starfað sem framkvæmdastjóri framleiðslu- og dreifingarsviðs Össurar í Bandaríkjunum. Hún er með B.A.-próf í alþjóðasamskiptum frá University of Sussex í Englandi og hefur samhliða starfi sínu í Bandaríkjunum stundað meistaranám í viðskiptum við Viðskiptaháskólann á Bifröst.
Þjónustu- og þekkinarmiðstöð fyrir blinda, sjónskerta og daufblinda einstaklinga er ný stofnun sem tók til starfa samkvæmt lögum nr. 160/2008 þann 1. janúar síðastliðinn.
