Ráðist gegn vanda heimilislausra

Tuttugu heimilislausum í Reykjavík hefur verið tryggt húsnæði, þjónusta og félagslegur stuðningur samkvæmt samningi sem Ásta Ragnheiður Jóhannesdóttir, félags- og tryggingamálaráðherra, og Hanna Birna Kristjánsdóttir, borgarstjóri í Reykjavík, hafa undirritað. Félags- og tryggingamálaráðuneytið mun leggja til 28,5 milljónir króna á hverju ári næstu þrjú árin, samtals 85,6 milljónir króna, til verkefnisins.

Samningurinn tryggir þeim sem glímt hafa við áfengis- og vímuefnaneyslu, eru hættir neyslu en eiga við margháttaða félagslega erfiðleika að stríða, aðstoð við að aðlagast samfélaginu á ný. Þjónustan felur í sér húsaskjól, félagslegan stuðning og endurhæfingu þannig að íbúar geti í framhaldinu búið sjálfstætt og tekið virkan þátt í samfélaginu án vímugjafa. SÁÁ útvegar húsnæði, annast rekstur þess og veitir umræddum hópi þá þjónustu sem hér um ræðir.

Við undirritun samningsins sagðist Ásta Ragnheiður Jóhannesdóttir, félags- og tryggingamálaráðherra, fagna því að hann væri nú í höfn. Ráðherra sagði „að samningurinn markaði tímamót þar sem lengi hefur verið brýn þörf fyrir aðstoð af þessu tagi, við fólk sem á að baki margar áfengis- og vímuefnameðferðir en er ekki fært um að búa á eigin vegum“.

Vegna samningsins hefur þegar verið gengið frá samstarfi SÁÁ og Reykjavíkurborgar til þriggja ára. Nú þegar eru tíu manns komnir í hús og njóta þjónustunnar.