Vöruskiptin í febrúar 2009
Úr Vefriti fjármálaráðuneytisins 5. mars 2009 - þú getur gerst áskrifandi að vefritinu.
Samkvæmt bráðabirgðatölum Hagstofu Íslands nam innflutningur vöru (fob) í febrúar 26,4 ma.kr. sem er nokkuð minni innflutningur en í janúar þegar hann nam 32,3 ma.kr.
Verðmæti útfluttrar vöru nam aftur á móti 32,3 ma.kr. í febrúar en í janúar nam útflutningurinn 33,6 ma.kr. Í febrúar nam því afgangur á vöruskiptum við útlönd 5,9 ma.kr.
Minni innflutningur í febrúar stafar annars vegar af minni innflutningi á hrá- og rekstrarvörum og hins vegar á eldsneyti og olíum en þessir liðir eru báðir mjög sveiflukenndir á milli mánaða. Lágt heimsmarkaðsverð á annars vegar áloxíði sem fylgir álverðinu jafnan mjög vel, og hins vegar olíu hefur greinilega þau áhrif að innflutningsverðmæti þessara liða fer minnkandi. Að öðru leyti er innflutningur í febrúar mjög svipaður og í janúar.
Útflutningsverðmæti sjávarafurða er lítið eitt meira en í janúar en verð íslenskra sjávarafurða í erlendri mynt hefur farið lækkandi að undanförnu. Vegna lágs gengis íslensku krónunnar er útflutningsverðmæti sjávarafurða enn gott í sögulegu samhengi. Útflutningsverðmæti áls er lágt annan mánuðinn í röð og er líklegt að lágt heimsmarkaðsverð á áli sé að draga úr útflutningsverðmæti greinarinnar um þessar mundir þó má ekki útiloka að um einhverja birgðaaukningu sé að ræða hjá álfyrirtækjunum.
