Menntamálaráðuneyti úthlutar 82 m.kr. til námskeiða í íslensku fyrir útlendinga vorið 2009

Menntamálaráðuneyti auglýsti styrki til íslenskukennslu fyrir útlendinga fyrir vorið 2009 þann 12. janúar sl. með umsóknarfresti til 2. febrúar sl.

Auglýst var eftir umsóknum um styrki til námskeiða sem ekki eru hluti af almennu námi á grunn- eða framhaldsskólastigi. Markmið með styrkjunum er að gefa öllum sem búsettir eru á Íslandi færi á að öðlast þá færni í íslensku að þeir geti orðið virkir samfélagsþegnar.

Fræðsluaðilar og fyrirtæki sem bjóða starfsmönnum sínum upp á skipulagða kennslu í íslensku og eru á fyrirtækjaskrá gátu sótt um styrkina.

Tæplega 40 fræðsluaðilar og fyrirtæki sóttu um samtals 125,5 m.kr. til íslenskukennslu að þessu sinni. Ráðuneytið hefur ákveðið að veita 33 fyrirtækjum og fræðsluaðilum styrki fyrir samtals 82 m.kr. vegna námskeiða í íslensku fyrir útendinga fyrri hluta árs 2009. Styrkir til námskeiða fyrir síðari hluta ársins verða auglýstir í haust.