Norðaustur Atlantshafsfiskveiðinefndin (NEAFC) lokar stórum svæðum á Atlantshafshryggnum til að vernda viðkvæm vistkerfi

Norðaustur Atlantshafsfiskveiðinefndin samþykkti nýverið að loka stórum svæðum á Atlantshafshryggnum til að vernda viðkvæm vistkerfi fyrir skaðlegum áhrifum botnveiðarfæra. Lokunin nær til 5 svæða og er viðbót við þau svæði sem þegar hefur verið lokað í sama tilgangi. Samanlagt eru hin nýju svæði 330.000 km² eða sem nemur ríflegri þrefaldri stærð Íslands. Sá hluti Atlantshafshryggjarins sem ekki fellur undir lokanir er skilgreindur sem “nýtt svæði” og gilda sérstakar reglur um hugsanlegar botnveiðar á slíkum svæðum.

Gul svæði eru nýjar lokanir á samningssvæði NEAFC. Græn svæði eru eldri lokanir á Hatton-Rockall svæðinu. Hvítar línu afmarka svæði sem kortlagt hefur verið sem veiðislóð botnveiðarfæra en hafsvæðið utan þeirra svæða er skilgreint sem “nýtt svæði”. Rauð lína markar úthafið á samningssvæði NEAFC.

Í janúar síðastliðnum gengu í gildi stjórnunarráðstafanir sem ætlað er að styðja við frekari verndun viðkvæmra vistkerfa á úthafinu á samningssvæði NEAFC. Í aðdraganda þess hafa allar botnfiskveiðar sl. 20 ára á samningssvæði NEAFC hafa verið kortlagðar. Þar sem botnfiskveiðar hafa ekki áður átt sér stað er einungis heimilt að stunda tilraunaveiðar sem fylgja ákveðnum skilyrðum s.s. um eftirlit og töku sýna. Á grunni þeirra upplýsinga sem fást við slíkar veiðar, á svæðum þar sem botnfiskveiðar hafa ekki verið stundaðar áður, er ákveðið hvort botnfiskveiðar á nýju veiðisvæði verða heimilaðar. Þá taka aðildarríkin á sig þá skyldu að skip þeirra stöðvi veiðar tafarlaust komi í ljós að veiðarnar raski viðkvæmum vistkerfum á hafsbotni sbr. reglur NEAFC um botnfiskveiðar á samningssvæði nefndarinnar.