Ríkisfjármálin rædd við forstöðumenn stofnana og hlutafélaga

Samgönguráðherra og fleiri fulltrúar samgönguráðuneytisins áttu í dag fund með forstöðumönnum stofnana og hlutafélaga ráðuneytisins vegna stöðunnar í ríkisfjármálum og tillagna um hagræðingu og sparnað.

Kristján L. Möller samgönguráðherra, Ragnhildur Hjaltadóttir ráðuneytisstjóri og fleiri fóru yfir helstu atriði í aðgerðaráætlun ríkisstjórnarinnar vegna samdráttar í ríkisfjármálum á þessu og næsta ári. Staða ríkisfjármála gerir auknar kröfur til ráðuneyta og stofnana um vandaðan undirbúning fjárlaga og góðar rekstraráætlanir. Ráðherra sagði að beita yrði miklum aga í ríkisfjármálum. Hann sagði allt til skoðunar, útgjöld sem tekjur og lagði hann áherslu á góða samvinnu milli ráðuneytis og stofnana og félaga.

Á fundinum var farið yfir svonefnd leiðarljós í ríkisfjármálum sem eru fjölmargar ábendingar og tilmæli um ýmsar aðgerðir sem grípa verður til í því skyni að mæta kröfum um niðurskurð. Samgönguráðuneytinu og stofnunum þess er gert að spara um 233 milljónir króna í rekstri á þessu ári og á næsta ári 10% í rekstrarkostnaði ráðuneytis og stofnana sem eru kringum 830 milljónir króna. Er þá ekki talinn með sá samdráttur sem ríkisstjórnin hefur ákveðið í vegaframkvæmdum, 3,5 milljarðar á þessu ári og rúmlega 8 milljarðar á því næsta.

Myndaður hefur verið vinnuhópur fulltrúa samgönguráðuneytisins og tengiliða í hverri stofnun og hlutafélagi til að undirbúa fjárlög næsta ársog leggja fram tillögur um hagræðingu og sparnað. Einnig á hópurinn að gera rekstraráætlanir og fylgja þeim eftir. Gert er ráð fyrir að á næstu þremur til fjórum vikum verði lagðar fram tillögur vegna undirbúnings fjárlaga næsta árs.