Nýr formaður Jafnréttisráðs
Árni Páll Árnason, félags- og tryggingamálaráðherra, hefur skipað Þórhildi Þorleifsdóttur formann Jafnréttisráðs. Hlutverk Jafnréttisráðs er að stuðla að jafnri stöðu og jöfnum rétti kvenna og karla á vinnumarkaði, veita stjórnvöldum ráðgjöf og gera tillögur til félags- og tryggingamálaráðherra um aðgerðir á þessu sviði.
Þórhildur er kunn af störfum sínum á sviði leiklistar og hefur einnig unnið að margvíslegum félagsmálum. Árin 1987–1991 sat Þórhildur á Alþingi fyrir Kvennalistann og sem varamaður árið 1993.
Fráfarandi formaður Jafnréttisráðs er Hildur Jónsdóttir, starfsmaður í forsætisráðuneytinu og sérfræðingur Stjórnarráðsins í jafnréttismálum.
