Sameiginleg fréttatilkynning íslenskra stjórnvalda og skilanefndar Kaupþings: Frestur vegna ákvörðunar um Nýja Kaupþing lengdur út nóvember

Fréttatilkynning nr. 73/2009

Fjármálaráðuneytið og skilanefnd Kaupþings hafa orðið ásátt um að lengja frest skilanefndarinnar til að taka endanlega ákvörðun um aðkomu kröfuhafa Kaupþings að Nýja Kaupþingi til 30. nóvember nk.

Samningar milli stjórnvalda og skilanefndarinnar, sem undirritaðir voru 3. september sl. kveða á um að í síðasta lagi 31. október 2009 liggi fyrir ákvörðun skilanefndarinnar um hvort Kaupþing eignist 87% hlutafjár í Nýja Kaupþingi strax eða hvort Nýja Kaupþing verði áfram að fullu í eigu ríkisins, en Kaupþing ætti möguleika á að eignast allt að 90% hlutafjár í bankanum á síðari stigum.

Það er mat samningsaðila að aukinn tíma þurfi til kostgæfniathugunar áður en skilanefndin tekur afstöðu í málinu. Meðal annars liggja ekki fyrir endanlegar fjárhagsupplýsingar fyrir árið 2008, né fyrstu níu mánuði ársins 2009. Þær upplýsingar hyggst Nýja Kaupþing afhenda innan tíðar.

Ákvörðun fjármálaráðuneytisins er tekin að höfðu samráði við yfirstjórn og endurskoðanda Nýja Kaupþings.

Fjármálaráðuneytinu, 30. október 2009