Ísland efst í alþjóðlegu mati á frammistöðu í umhverfismálum.

Ísland er í fyrsta sæti af 163 þjóðum í samræmdri umhverfisvísitölu sem hópur umhverfissérfræðinga í Yale og Columbia háskólunum tekur saman. Frá þessu var greint á ársfundi World Economic Forum í Davos í Sviss þann 28. janúar. Vísitalan sem kallast á ensku Environmental Performance Index (EPI) er nú birt í þriðja sinn en hún hefur verið gefin út annað hvort ár frá árinu 2006.

Samkvæmt niðurstöðum umhverfissérfræðinganna er hreinleikinn meðal helstu styrkleika Íslands en hér á landi eru minnst heilsufarsvandamál tengd umhverfisvandamálum. Aðrir styrkleikar eru vatnsgæði, þar sem Ísland fær fullt hús stiga eitt landa í mælingunni, lítil losun gróðurhúsalofttegunda á hvern íbúa, orkuframleiðsla og átak í endurheimt skóga.

Löndin í næstu sætum á eftir Íslandi eru Sviss, Kosta Ríka, Svíþjóð og Noregur. Ríki Evrópusambandsins koma að jafnaði vel út i og eru 20 þeirra ofar á listanum en Bandaríkin sem lenda í 61. sæti. Augljóst er að þjóðartekjur hafa mikil áhrif á frammistöðu á umhverfismálum en löndin í botnsætunum, Tógó, Angóla, Máritanía, Miðafríkulýðveldið og Síerra Leone glíma öll við mikla fátækt og skort á nauðsynlegum innviðum. Nýmarkaðsríkin Kína og Indland eru í 121. og 123. sæti sem er vísbending um að hraður vöxtur undanfarinna ára hafi að einhverju leyti verið á kostnað umhverfisins.

Þótt meginreglan sé sú að ríki með svipaðar tekjur og á sömu svæðum fái líka útkomu úr matinu eru á því undantekningar sem að mati skýrsluhöfunda sýna mikilvægi þess að reka virka umhverfisstefnu. Í því sambandi benda þeir á muninn á frammistöðu Chile í 16. sæti og Argentínu í 70. sæti.

Hvatning til að gera enn betur