Flugstoðir og Keflavíkurflugvöllur sameinuð í nýtt opinbert hlutafélag
Stofnað var í dag opinbert hlutafélag um sameinaðan rekstur opinberu hlutafélaganna Flugstoða og Keflavíkurflugvallar. Samgöngu- og sveitarstjórnarráðherra, Kristjáni L. Möller, var heimilað með lögum nr. 153/2009 sem samþykkt voru á Alþingi 21. desember 2009 að gangast fyrir stofnun félagsins.
Tilgangur hins nýja félags er að reka alla flugvelli landsins og sjá um uppbyggingu þeirra ásamt tilheyrandi flugstöðvum og mannvirkjum, reka og byggja upp flugleiðsögu- og flugumferðarþjónustu og annast rekstur starfsemi sem er í beinum tengslum við flugrekstur. Nafn hins nýja félags hefur ekki verið ákveðið ennþá en heiti þess í upphafi er FLUG-KEF ohf.
Samkvæmt 5. gr. laganna skal félagið taka yfir öll réttindi og allar skuldbindingar yfirteknu félaganna sem kveðið er á um í lögum nr. 102/2006, um stofnun hlutafélags um flugleiðsöguþjónustu og flugvallarekstur Flugmálastjórnar Íslands, og lögum nr. 76/2008, um stofnun opinbers hlutafélags um rekstur Keflavíkurflugvallar o.fl. Fjármálaráðherra fer með hlut ríkisins í félaginu.
Á stofnfundinum var stofnskrá fyrir félagið undirrituð og samþykktir félagsins samþykktar af fulltrúa fjármálaráðherra, Þórhalli Arasyni. Þá var kjörin stjórn og sitja í henni sjö aðalmenn og sjö til vara.
Aðalmenn eru:
Þórólfur Árnason
Arngrímur Jóhannsson
Rannveig Guðmundsdóttir
Arnbjörg Sveinsdóttir
Ásta Rut Jónasdóttir
Ragnar Óskarsson
Jón Norðfjörð
Á stjórnarfundi að loknum stofnfundinum skipti stjórnin með sér verkum og var Þórólfur kjörinn formaður. Í framhaldi af stofnfundinum verða í næstu viku haldnir hluthafafundir í Flugstoðum ohf. og Keflavíkurflugvelli ohf.
Kristján L. Möller, samgöngu- og sveitarstjórnarráðherra, flutti ávarp í lok fundar og sagði að stjórn hins nýja félags hefði með höndum umfangsmikið hlutverk strax á fyrsts degi. Hann kvaðst vænta þess að hún ætti gott samstarf við fjármálaráðherra og fjármálaráðuneytið svo og samgöngu- og sveitarstjórnarráðherra og samgöngu- og sveitarstjórnarráðuneytið. Hann sagði það verkefni samgöngu- og sveitarstjórnarráðherra að bera ábyrgð á faglegri stefnumótun félagsins í samvinnu við stjórnina. Óskaði hann að lokum hinu nýja félagi velfarnaðar.