Ögmundur Jónasson tekur við embætti ráðherra

Kristján L. Möller, samgöngu- og sveitarstjórnarráðherra, lét af embætti sínu í dag og við því tók Ögmundur Jónasson sem jafnframt gegnir embætti dómsmála- og mannréttindaráðherra. Þessi breyting á ríkisstjórn og fleiri fóru fram á ríkisráðsfundi á Bessastöðum í hádeginu.

Ögmundur Jónasson hefur áður gegnt embætti ráðherra, var heilbrigðis- og tryggingamálaráðherra frá 1. febrúar 2009 til 1. október 2009. Hann hefur setið á Alþingi frá árinu 1995.

Kristján L. Möller tók við ráðherraembætti 24. maí 2007 en hann hefur setið á Alþingi frá árinu 1999.

Kristján L. Möller afhenti Ögmundi Jónassyni lyklavöldin að ráðuneytinu síðdegis í dag.