Embætti ráðuneytisstjóra nýs innanríkisráðuneytis auglýst

Auglýst hefur verið laust til umsóknar embætti ráðuneytisstjóra nýs innanríkisráðuneytis. Umsóknarfrestur er til 13. október næstkomandi. Auglýsingin er svohljóðandi:

Innanríkisráðuneytið verður til við sameiningu samgöngu- og sveitarstjórnarráðuneytis og dómsmála- og mannréttindaráðuneytis hinn 1. janúar 2011, sbr. lög nr. 121/2010, um breytingu á lögum um Stjórnarráð Íslands, nr. 73/1969, með síðari breytingum.

Hið nýja innanríkisráðuneyti mun fara með þau málefni, sem nú heyra undir dómsmála- og mannréttindaráðuneyti og samgöngu- og sveitarstjórnarráðuneyti, sbr. 3. og 9. gr. reglugerðar nr. 177/2007 um Stjórnarráð Íslands.

Gerð er krafa um háskólamenntun sem nýtist í starfi ásamt þekkingu og reynslu á verkefnasviði hins nýja innanríkisráðuneytis. Áhersla er lögð á stjórnunarreynslu, ásamt færni í mannlegum samskiptum. Jafnframt er gerð krafa um góða tungumálakunnáttu auk hæfni til að tjá sig í ræðu og riti. Einnig er mikilvægt að viðkomandi hafi þekkingu og reynslu á sviði opinberrar stjórnsýslu.

Um er að ræða fullt starf og gengið verður frá ráðningu hið fyrsta. Skipað er í embættið til fimm ára og mun ráðuneytisstjóri taka við embætti 1. janúar 2011 og stýra innanríkisráðuneyti undir stjórn innanríkisráðherra. Fram til þess dags eða þar til nýtt ráðuneyti hefur starfsemi, mun nýr ráðuneytisstjóri vinna að sameiningu ráðuneytanna ásamt sérstakri verkefnisstjórn.

Um laun og önnur starfskjör fer samkvæmt ákvörðun kjararáðs, sbr. lög nr. 47/2006, með síðari breytingum.

Upplýsingar um starfið veita Ingilín Kristmannsdóttir, skrifstofustjóri, í samgöngu- og sveitarstjórnarráðuneytinu, í síma 545 8200 og Bryndís Helgadóttir, skrifstofustjóri í dómsmála- og mannréttindaráðuneytinu, síma 545 9000.

Umsóknir sendist á [email protected] dómsmála- og mannréttindaráðuneytið, Skuggasundi 1, 101 Reykjavík og [email protected] samgöngu- og sveitarstjórnarráðuneytið, Hafnarhúsinu við Tryggvagötu, 150 Reykjavík. Umsóknum skulu fylgja ítarlegar upplýsingar um menntun og starfsferil.

Umsóknarfrestur rennur út þann 13. október 2010. Öllum umsóknum verður svarað þegar ákvörðun um ráðningu liggur fyrir.

Dómsmála- og mannréttindaráðuneytið
og samgöngu- og sveitarstjórnarráðuneytið.