Fjárlagafrumvarp 2011 - útgjöld forsætisráðuneytisins dragast saman um 8,3% eða 16% á tveimur árum
Heildargjöld forsætisráðuneytis samkvæmt fjárlagafrumvarpi fyrir árið 2011 eru áætluð 903,9 m.kr. á rekstrargrunni að frádregnum sértekjum. Að teknu tilliti til áhrifa af almennum verðlags- og gengisbreytingum lækka útgjöldin um 81,7 m.kr. milli ára eða sem svarar til 8,3% lækkunar. Í fjárlögum 2010 lækkuðu heildarútgjöld forsætisráðuneytisins um 91,8 m.kr. frá árinu á undan og hefur því fjárlagarammi ráðuneytisins dregist saman um 173,5 m.kr. á tveimur árum eða 16%.
Útgjöld og fjármögnun forsætisráðuneytis breytist milli ára sem hér segir:
| Rekstrargrunnur | Reikningur | Fjárlög | Frumvarp | Breyting frá fjárl. % |
Breyting frá reikn. % |
| 2009 | 2010 | 2011 | |||
| m.kr. | m.kr. | m.kr. | |||
| Rekstrargjöld | 890,3 | 746,7 | 676,7 | -9 | -24 |
| Neyslu- og rekstrartilfærslur | 150,4 | 133,5 | 131,8 | -1 | -12 |
| Stofnkostnaður og viðhald | 164,9 | 105,4 | 95,4 | -9 | -42 |
| Samtals | 1.205,60 | 985,6 | 903,9 | -8 | -25 |
Hagræðingar- og sparnaðaraðgerðir, 88,5 m.kr. eða 9% lækkun
Útgjaldabreytingum milli ára má skipta í þrjá þætti. Í fyrsta lagi verða gerðar ráðstafanir til að lækka útgjöld ráðuneytisins í samræmi við markmið sem ríkisstjórnin hefur sett í áætlun um jöfnuð í ríkisfjármálum sem voru að ná fram 9% lækkun á veltu stjórnsýslu- og eftirlitsstofnana. Í undirbúningi og greiningu forsætisráðuneytisins á hugmyndum og valkostum í aðaldsráðstöfunum árið 2011 var horft til niðurskurðar fyrra árs sem og rekstraráætlana liða og stofnana fyrir árið í ár, hverjar afgangsheimildar eru sem og hvar möguleiki er á sértækum aðgerðum í sparnaðarskyni. Ekki var farið í flatan niðurskurð á alla liði og stofnanir forsætisráðuneytisins heldur var markmiðið að tillögugerð ráðuneytisins um niðurskurð mætti byggja á traustum forsendum og verði líkleg til að endurspegla árangur. Sparnaðartillögur forsætisráðuneytisins fyrir árið 2011 nema samtals 88,5 m.kr. eða 9%.
| Sparnaður - skipting eftir málaflokkum ráðuneytisins | Fjárlög | Sparnaður m.kr. | Sparnaður % | Útgjalda- | Frumvarp |
| 2010 | skuldb. og | 2011 | |||
| m.kr. | verðlagsh. | m.kr. | |||
| Forsætisráðuneyti, aðalskrifstofa | 305,7 | -27,0 | 9% | 3,8 | 282,5 |
| Ýmis verkefni | 234,9 | -22,3 | 9% | -1,7 | 210,9 |
| Stofnanir | 445,0 | -39,2 | 9% | 4,7 | 410,5 |
| Samtals | 985,60 | -88,5 | 6,80 | 903,90 |
Í öðru lagi er um að ræða ýmsar breytingar á útgjaldaskuldbindingum sem falla til á árinu 2011 en nettóhækkun vegna þeirra er 2 m.kr. og loks bætast við verðlagshækkanir ársins 2011, sem eru áætlaðar 4,8 m.kr., þannig að heildargjöldin fyrir forsætisráðuneytið verða 903,9 m.kr.
Reykjavík 8. október 2010