Fimm félagasamtök fá 46 milljónir til alþjóðlegrar neyðaraðstoðar

Utanríkisráðuneytið hefur falið fimm íslenskum félagasamtökum að verja um 46 milljónum króna til alþjóðlegrar neyðar- og mannúðaraðstoðar. Þessi upphæð kemur til viðbótar þeim 46 milljónum, sem veittar voru til neyðar og mannúðaraðstoðar á fyrrihluta árs 2010 og 23 milljóna, sem félagasamtök fengu til ráðstöfunar vegna náttúruhamfara á Haiti og í Pakistan. Þær 46 milljónir, sem nú hefur verið úthlutað renna til fjögurra landa.

SOS barnaþorpin fá 12,5 milljónir króna til að byggja fjölskylduhús í SOS barnaþorpi í Úganda, Rauði kross Íslands fær 5 milljónir til að styrkja mannúðarstarf Alþjóðaráðs Rauða krossins í Austur-Kongó, þar sem stríð geisar, RKÍ fær einnig 10 milljónir króna til að aðstoða fórnarlömb jarðskjálftanna á Haíti, Barnaheill fá sömuleiðis 6 milljónir króna til að ráðstafa til nauðstaddra á Haíti, Hjálparstarf kirkjunnar fær 10 milljónir til að styðja við bakið á fórnarlömbum flóðanna í Pakistan og ABC barnahjálpin fær um 2 milljónir króna til að bæta tjón, sem varð á einum af skólum samtakanna í Pakistan í fellibyl.

Gert er ráð fyrir ákveðnu framlagi til neyðar- og mannúðaraðstoðar á vegum frjálsra félagasamtaka á fjárlögum, sem úthlutað er tvisvar á ári, vor og haust. Því til viðbótar svarar ríkisstjórn Íslands ákalli hjálparstofnana þegar skyndilegt neyðarástands skapast líkt og gerðist á Haíti og í Pakistan 2010.