Palestínumenn þakka frumkvæði Íslands

Össuri Skarphéðinssyni, utanríkisráðherra, hefur borist bréf frá Dr. Riad Malki, utanríkisráðherra Palestínu, þar sem hann þakkar fyrir stuðning utanríkisráðherra og Alþingis við sjálfstæði Palestínuríkis. Í bréfinu er komið á framfæri þakklæti fyrir ályktun Alþingis sem samþykkt var 29. nóvember síðastliðinn og kveður á um að ríkisstjórn Íslands sé falið að viðurkenna Palestínu sem sjálfstætt og fullvalda ríki innan landamæranna frá því fyrir sex daga stríðið árið 1967.
Utanríkisráðherrann segir að viðurkenning Íslands á Palestínu muni skapa söguleg tækifæri til að styrkja samskipti ríkjanna. Þá ítrekar hann að palestínska þjóðin og leiðtogar hennar vilji stuðla að réttlátri og friðsamlegri lausn á deilumálum Palestínumanna og Ísraela sem byggist á viðeigandi ályktunum Sameinuðu þjóðanna.