Framtíð innanlandsflugs til umræðu á Alþingi

Sérstök umræða um framtíð innanlandsflugs á Íslandi fór fram á Alþingi í dag. Einar K. Guðfinnsson var málshefjandi og sagði hann ríkja óvissu um stöðu innanlandsflugs meðal annars vegna umræðna um framtíð Reykjavíkurflugvöll. Einnig taldi hann að hækkanir gjalda á umferð um flugvelli valda mjög auknum byrðum á innanlandsflug og farþega þess.

Ögmundur Jónasson innanríkisráðherra þakkaði fyrir umræðuna og kvaðst telja það grundvallaratriði að Reykjavíkurflugvöllur yrði áfram þar sem hann er nú. Hann sagði það myndu hafa gríðarleg áhrif á innanlandsflugið ef starfsemi Reykjavíkurflugvallar yrði flutt til Keflavíkurflugvallar og sagði það vera í andstöðu við þá stefnu sína að fá betra jafnvægi í flutningum á sjó, á landi og í lofti. Um hækkanir á gjöldum á flugvöllum sagði hann að ná yrði meiri tekjum til að geta sinnt eðlilegu viðhaldi á flugvöllum og sagði vissulega rétt að hafa augum opin fyrir áhrifum aukinnar gjaldtöku á flugið og hann kvaðst taka alvarlega varnaðarorð þingmanna þar að lútandi.

Allmargir þingmenn tóku þátt í umræðunni og komu fram bæði sjónarmið um að flugvöllurinn í Vatnsmýri skyldi lagður niður þar sem hagkvæmara væri að nýta Vatnsmýri á annan hátt og að hann yrði þar áfram, ella myndi innanlandsflug nánast leggjast af.