Heimboð Íslendinga gera víðreist ... fréttamiðlar í 57 löndum fjölluðu um átakið
„Fiskisagan flýgur“ segir orðtakið og það má til sanns vegar heimfæra það upp á heimboð Íslendinga til útlendra ferðamanna í tengslum við markaðsverkefnið „Ísland allt árið“. Átakið náði að kitla fréttanef fréttastjóra ótal fjölmiðla í 57 löndum sem birtu fréttir um heimboðin. Þeirra á meðal eru margar af stærstu fréttastofum heims, s.s. CNN, BBC, MSNBC, CNBC, Yahoo.com, Reuters, LA Times, The Times of London ... svo aðeins nokkrar séu upp taldar.
Þá náðu heimboðin miklu flugi í samfélagsmiðlum af öllu tagi og telst mönnum til að rúmlega 15 milljónir manna hafi - „commentað“/“twittað“/bloggað/tíst/og hvað þetta nú allt heitir - um átakið og að sú umfjöllun hafi náð athygli 451 milljón notenda um allan heim.
Heimboðin voru upphaflega hugsuð sem upptakturinn að þriggja ára markaðsverkefni „Ísland – allt árið“ sem miðar að því að fjölga erlendum ferðamönnum utan hins hefðbundna ferðamannatíma um sumarið. Árangurinn fór fram úr björtustu vonum og mikill fjöldi Íslendinga um allt land tók þátt í verkefninu við miklar og góðar undirtektir erlendu gestanna og heimspressunnar.
Í upphafi var einungis reiknað með að heimboð stæðu í tvo mánuði, en vegna góðrar þátttöku og mikils áhuga ferðamanna hefur verið ákveðið að heimboðin verði áfram hluti af verkefninu, en reynt verður að tengja þau áherslum herferðarinnar hverju sinni.
Íslandsstofa annast framkvæmd verkefnisins, sem er undir stjórn iðnaðarráðuneytis, fjármálaráðuneytis, Icelandair, Reykjavíkurborgar, Samtaka ferðaþjónustunnar, Iceland Express, ISAVIA, Samtaka verslunar og þjónustu og Landsbankans. Rúmlega 130 fyrirtæki eru þátttakendur í verkefninu.
