Náttúruhamfara í Japan minnst

Hinn 27. mars hélt sendiráð Japans á Íslandi athöfn í Ráðhúsi Reykjavíkur til að minnast þess að 11. mars síðastliðinn var liðið ár frá hamförunum miklu í Japan sem fylgdu í kjölfar jarðskjálftans við austurströnd landsins.

Össur Skarphéðinsson, utanríkisráðherra, ávarpaði minningarathöfnina. Færði hann Japönum samúðarkveðjur íslensku þjóðarinnar og vottaði látnum fórnarlömbum hamfaranna virðingu sína. Í máli utanríkisráðherra kom meðal annars fram að stærð jarðskjálftans og flóðbylgjunnar sem fylgdi í kjölfarið eigi sér fá fordæmi og náttúruöflin hafi þar sýnt ofurmátt sinn. Sagði hann viðbrögð og endurreisnarstarf Japana aðdáunarverð og að Japanir geti reitt sig á stuðning Íslendinga.

Á myndinni má sjá utanríkisráðherra ásamt Masayuki Takashima, sendiherra.