Innanríkisráðherra ræðumaður á kirkjukvöldi í Sauðárkrókskirkju
Ögmundur Jónasson innanríkisráðherra var ræðumaður síðastliðið mánudagskvöld á kirkjukvöldi í Sauðárkrókskirkju sem er liður í árlegri sæluviku Skagfirðinga. Á dagskrá kirkjukvöldsins var einnig söngur Kirkjukórs Sauðárkróks og Helga Rós Indriðadóttir söng einsöng við meðleik Helgu Bryndísar Magnúsdóttur.
Í ræðu sinni dró ráðherrann upp mynd af því hvernig skagfirsk ljóðskáld hefðu gjarnan ort um Skagafjörðinn og vitnaði hann meðal annars til Hannesar Péturssonar, Andrésar Björnssonar eldri, Jónasar Jónassonar og Stephans G. Stephanssonar. Einnig fjallaði hann um lýsingu Páls Kolka á Húnvetningum og Skagfirðingum og minnti á hvernig það besta úr menningu fortíðar eigi erindi við okkar samtíð ef við vildum vera landi okkar og þjóð hollráð. Það gæfi fast land undir fætur og gæfi sjálfstraust.
