Innanríkisráðherra heimsótti skátamótið á Úlfljótsvatni

Ögmundur Jónasson innanríkisráðherra heimsótti skátamótið á Úlfljótsvatni um helgina ásamt konu sinni Valgerði Andrésdóttur. Mótinu lauk um helgina.

Forráðamenn skátahreyfingarinnar kynntu mótshaldið og svæðið fyrir ráðherranum en þar reis heilt þorp sem skipulagt var út í æsar og þaulhugsað. Skin og skúrir hafa skipst á í mótshaldinu, úrhelli var í byrjun en síðan blíða.

Mikil uppbygging hefur átt sér stað á Úlfljótsvatni og aðstaðan öll til fyrirmyndar. Umhverfið býður uppá ýmsa möguleika, svo sem silungsveiði, fjallgöngur og bátsferðir á vatninu. Fram kom í heimsókninni að ákveðið hefur verið að halda alheimsmót skáta á Úlfljótsvatni árið 2017.

Á myndinni eru frá vinstri: Hermann Sigurðsson, framkvæmdastjóri Bandalags íslenskra skáta, Margrét Tómasdóttir, fyrrverandi skátahöfðingi, Björgvin Magnússon, skólastjóri Gilwell skólans til langs tíma, og síðan Ögmundur Jónasson og Valgerður Andrésdóttir.