Skrifað undir samning um árangursstjórnun við Fangelsismálastofnun

Innanríkisráðherra og fangelsismálastjóri skrifuðu í síðustu viku undir þjónustusamning sem kveður á um gagnkvæmar skyldur innanríkiráðuneytis og Fangelsismálastofnunar ríkisins. Tilgangurinn er að festa í sessi ákveðið samskiptaferli milli aðila og skerpa áherslur um stefnumótun, framkvæmd verkefna og áætlanagerð.

Með samningnum er einnig lagður grunnur að mati á árangri af starfsemi Fangelsismálastofnunar og er honum þannig ætlað að styrkja beitingu árangursstjórnunar sem stýritækis innan stofnunarinnar. Í samningnum eru tiltekin helstu verkefni og hlutverk, markmið og áherslur og fjallað um gagnkvæmar skyldur og ábyrgð samningsaðila. Samningurinn tók gildi við undirskrift, 23. apríl, og gildir í fjögur ár.