Samstarf Íslands og Finnlands í brennidepli

Gunnar Bragi Sveinsson utanríkisráðherra og Erkki Tuomioja, utanríkisráðherra Finnlands, ræddu samskipti Íslands og Finnlands á fundi í Helsinki í dag.

Ráðherrarnir ræddu þátttöku Finnlands og Svíþjóðar í loftrýmiseftirliti á Íslandi í næsta mánuði sem leitt verður af norska flughernum. Gunnar Bragi segir að sögulegt skref verði stigið í norrænu samstarfi með þátttöku ríkjanna í eftirlitinu og fagnar hann auknu samstarfi íslenskra og finnskra stjórnvalda á sviði öryggismála.

"Utanríkisstefna beggja ríkja byggist á því að nýjum áskorunum í öryggismálum verði best mætt með því að efla viðbragðsgetu með virku milliríkjasamstarfi " segir Gunnar Bragi.

Hann segir Finna búa yfir mikilli þekkingu og reynslu á eftirliti og viðbrögðum við erfiðar aðstæður á norðurslóðum. Þeir séu reiðubúnir að miðla henni til Íslands og vilja jafnframt læra af reynslu okkar.

 "Það eru gagnkvæmir hagsmunir Finnlands, Íslands og annarra ríkja sem munu taka þátt í eftirliti og æfingum í næsta mánuði að styrkja þessi tengsl í ljósi þeirra breytinga sem nú eiga sér stað á norðurslóðum" segir Gunnar Bragi.

Á fundi ráðherranna var fjallað um samstarf ríkjanna á vettvangi Norðurlandasamstarfsins, Norðurskautsráðsins og í öðru svæðasamstarfi í Norður-Evrópu. Samskipti ríkjanna í viðskiptamálum og menningarmálum voru til umfjöllunar og hvernig þau geta lært hvort af öðru við hagsmunagæslu, viðskiptaþjónustu og borgaraþjónustu á alþjóðavísu. Þá ræddu ráðherrarnir málefni Evrópusambandsins, grannríkjasamstarf þess og þróun mála í Mið-Austurlöndum.

Fyrr í dag heimsótti Gunnar Bragi ísbrjótinn Urho þar sem hann fékk kynningu á starfsemi Arctia Shipping sem starfrækir ísbrjóta og fjölnotaskip víðsvegar um heiminn. Síðdegis heimsótti hann norrænar stofnanir og kynnti sér starfsemi Norræna fjárfestingarbankans, Norræna þróunarsjóðsins og Norræna umhverfisfjármögnunarfélagsins. Á morgun mun ráðherrann eiga fund með finnsk-íslenska viðskiptaráðinu.