Drög að reglugerð um starfsaðferðir Flugöryggisstofnunar Evrópu til umsagnar
Til umsagnar eru nú hjá innanríkisráðuneyti drög að reglugerð um starfsaðferðir Flugöryggisstofnunar Evrópu við eftirlit með stöðlun. Unnt er að senda ráðuneytinu umsagnir til og með 2. júlí næstkomandi á netfangið [email protected].
Markmið reglugerðar þessarar er að uppfæra starfsaðferðir við eftirlit með stöðlun hjá flugmálayfirvöldum aðildarríkjanna og setja á fót eftirlit með framkvæmd reglugerðar (EB) nr. 216/2008, um sameiginlegar reglur um almenningsflug og um stofnun Flugöryggisstofnunar Evrópu og framkvæmdareglugerðum hennar.
Óvissa og kostnaður er óverulegur þar sem hér er fyrst og fremst verið að uppfæra reglur sem þegar hafa verið innleiddar hér.
Reglugerð um starfsaðferðir Flugöryggisstofnunar Evrópu við eftirlit með stöðlun er ætlað að innleiða hér á landi reglugerð (ESB) nr. 628/2013 en hún afnemur reglugerð (EB) nr. 736/2006, sem innleidd var í íslenskan rétt með reglugerð nr. 966/2007. Meðfylgjandi drög afnema því jafnframt reglugerð nr. 966/2007.
Reglugerð (ESB) nr. 628/2013 var tekin upp í EES-samninginn með ákvörðun sameiginlegu EES-nefndarinnar nr. 27 frá 14. febrúar síðastliðinum. Reglugerðin er jafnframt birt í EES-viðbæti við stjórnartíðindi ESB nr. 12 frá 27. febrúar 2014, bls. 189.
Lagastoð er að finna í 146. gr., sbr. 145. gr. laga um loftferðir nr. 60/1998, með síðari breytingum.