Tekjuskattur einstaklinga - dreifing og áhrif á ríkissjóð

Fjármála- og efnahagsráðuneytið hefur tekið saman upplýsingar um tekjuskattsgreiðslur einstaklinga og dreifingu eftir tekjutíundum að teknu tilliti til útsvars og vaxta- og barnabóta. Upplýsingarnar eru unnar upp úr álagningarskrá ríkisskattstjóra. Samtals eru 201.693 framtalseiningar (heimili) skráðar á tekjuárinu 2013, ungmenni frá 16 ára aldri þar með talin. Heildartekjur samanstanda m.a. af launatekjum, tekjum af atvinnurekstri, greiðslum frá lífeyrissjóðum og  tekjum greiddum af ríkissjóði svo sem atvinnuleysisbótum, örorku- og ellilífeyri frá Tryggingastofnun. Aðrir skattar sem einstaklingar kunna að greiða, til að mynda virðisaukaskattur og fjármagnstekjuskattur, eru ekki hluti af þessari umfjöllun.

Nettótekjur ríkisins af fyrstu 70% framteljanda (raðað eftir tekjum) eru neikvæðar í tekjuskattskerfi einstaklinga að teknu tilliti til útsvarsgreiðslna og vaxta- og barnabóta. Í rauninni eru það aðeins tekjuhæstu 30% framteljenda sem standa undir tekjum ríkissjóðs af tekjuskattskerfinu.

Nettótekjur ríkissjóðs af tekjuskatti árið 2013 voru liðlega 95 ma.kr. að teknu tilliti til þátttöku ríkissjóðs í útsvarsgreiðslum til sveitarfélaga, en þær námu 10,4 ma.kr., og barna- og vaxtabóta , sem námu 17,5 ma.kr. 

Heimilin greiða að meðaltali 1,2 m.kr. í tekjuskatta þar af fara að meðaltali 733 þúsund kr. í útsvar.  Meðaltekjur ríkissjóðs eru þannig 471 þúsund kr. á heimili. Efsta tekjubilið er eina tekjubilið sem greiðir að meðaltali hærri fjárhæð í tekjuskatt til ríkissjóðs en útsvar til sveitarfélaga.