Eitt ár liðið frá gildistöku fríverslunarsamnings við Kína

Eitt ár er í dag frá gildistöku fríverslunarsamnings Íslands og Kína. Af því tilefni hefur sameiginleg nefnd samningsaðila fundað í gær og dag í Reykjavík en þetta er fyrsti fundur nefndarinnar. Farið hefur verið yfir framkvæmd samningsins, helstu hnökra í því sambandi og rætt hvernig megi greiða úr þeim. Samhliða funduðu tollayfirvöld ríkjanna um framkvæmdina.

Fulltrúar ríkjanna voru sammála um að framkvæmdin hafi í öllum grundvallaratriðum gengið vel og að samningurinn feli í sér mikil ónýtt tækifæri.

Rætt var um mikilvægi þess að hraða vinnu við að greiða enn frekar fyrir útflutningi til Kína á sjávarafurðum og landbúnaðarvörum, svo og heilsuvörum, snyrtivörum og fleiru. Fóru fram viðræður milli fulltrúa viðkomandi stofnana frá Kína og Matvælastofnunar um þau atriði á fundinum auk þess sem sérstök kynning á þeim reglum sem gilda um markaðssetningu á heilsuvörum í Kína.

Kína er nú stærsta viðskiptaland Íslands í Asíu og 5. stærsta innflutningslandið. Útflutningur til Kína hefur aukist jafnt og þétt síðustu mánuði en landið er nú í 21. sæti yfir útflutningslönd frá Íslandi. Útflutningur frá Íslandi til Kína dróst tímabundið saman árið 2014 m.a. vegna samdráttar í fiskveiðum en fyrstu fjóra mánuði 2015 hefur útflutningurinn aukist, var 2,1 milljarður ÍSK í ár en 1,3 milljarður ÍSK í fyrra. Minni auking hefur verið á innflutningi frá Kína en hann nam 47,8 milljörðum ÍSK árið 2013 en 46,5 milljörðum ÍSK 2014. Meðal þess sem flutt er inn eru vélar, samgöngutæki og fatnaður.