Drög að breytingu á reglugerð um ökuskírteini
Innanríkisráðuneytið hefur til umsagnar drög að breytingu á reglugerð um ökuskírteini. Unnt er að senda ráðuneytinu athugasemdir til og með 9. nóvember næstkomandi og skulu þær sendar á netfangið [email protected].
Með breytingu á reglugerð um ökuskírteini, nr. 830/2011, verður heimilt að kenna og prófa á sjálfskiptar bifreiðar í C1- og D1- flokki, sem eru minni gerðir vöru- og hópbíla. Þessi heimild er nú þegar í ökutækjaflokkum fyrir stærri vöru- og hópbifreiðar.
Einnig er breyting á kennslu til eftirvagnaréttinda í flokki stórra eftirvagna við fólksbifreið (BE-flokki), stórra eftirvagna við litla vörubifreið (C1E-flokki) og stórra eftirvagna við litla hópbifreið (D1E-flokki), þannig að krafa um fjögurra tíma bóklegt námskeið er felld niður. Nemandi fær þannig frelsi til að velja með hvaða hætti hann aflar sér nauðsynlegrar þekkingar á reglum um akstur með eftirvagna en eftir sem áður verður þekking og færni nemanda könnuð í verklegu prófi sem felur í sér bæði munnlegt próf og próf í aksturshæfni.
Einnig er breyting á réttindum til verklegrar kennslu í BE-flokki þannig að þau verða ekki einskorðuð við ökukennara sem hafa réttindi til kennslu aukinna ökuréttinda heldur við ökukennara almennt sem sjálfir hafa réttindi til að aka með stórar kerrur.