Formaður hermálanefndar NATO á Íslandi

Formaður hermálanefndar Atlantshafsbandalagsins, Petr Pavel hershöfðingi, heimsækir í dag Ísland. Hann átti í morgun fund með Stefáni Hauki Jóhannessyni ráðuneytisstjóra utanríkisráðuneytisins, auk þess sem hann hitti aðra embættismenn ráðuneytisins, forstjóra Landhelgisgæslunnar og starfsmenn hennar. 

Á fundunum var rætt um stöðu alþjóðlegra öryggismála og þau verkefni sem Atlantshafsbandalagið glímir við í ljósi breyttra aðstæðna í öryggismálum Evrópu. Rædd voru störf, stuðningur og framlög Íslands á vettvangi bandalagsins, m.a. til samstöðuaðgerða, í Afganistan, á vettvangi bandalagsins sjálfs og á Íslandi, þ.m.t. rekstur íslenska loftvarnarkerfisins. 

Formaður hermálanefndar hélt einnig hádegisfyrirlestur í Norræna húsinu í boði Varðbergs, þar sem hann fjallaði um nýjar áskoranir í Norður-Evrópu.