Ráðherra ákvarðar heildarafla fyrir næsta fiskveiðiár

Þorgerður Katrín Gunnarsdóttir, sjávarútvegs- og landbúnaðarráðherra, hefur gefið út reglugerð um leyfilegan heildarafla í íslenskri fiskveiðilögsögu fyrir næsta fiskveiðiár, 2017/2018. Ákvörðun ráðherra er tekin að höfðu samráði við ríkisstjórn, hagsmunaaðila í sjávarútvegi auk stjórnarandstöðu og formanni atvinnuveganefndar Alþingis. Ráðherra fylgir veiðiráðgjöf Hafrannsóknastofnunar í öllum tegundum.

Í nýlegri skýrslu Hafrannsóknastofnunar kemur fram að staða margra fiskistofna sé sterk og því ráðleggur stofnunin aukinn afla í mikilvægum tegundum s.s. þorski og ýsu. Hins vegar er ástand íslensku sumargotssíldarinnar slæmt vegna sýkingar og þarf því að draga verulega úr veiðum. 

Sjálfbær nýting og varúðarstefna eru grunnforsendur ráðgjafar Hafrannsóknastofnunar ákvörðunar ráðherra, en fyrir sífellt fleiri af helstu nytjastofnum hefur verið sett nýtingarstefna sem byggir á aflareglu. Við mótun nýtingarstefnu er haft samráð við hagsmunaaðila, auk þess sem leitað er eftir áliti og staðfestingu frá Alþjóða hafrannsóknaráðinu. Má því fullyrða að fiskveiðar við Ísland standist alþjóðleg sjónarmið um sjálfbærni og varúð.

„Í heildina litið eru þetta góð tíðindi sem benda eindregið til þess að stjórn fiskveiða hér við land hafi verið ábyrg á síðustu árum og skili nú þessum árangri þó að ástand síldarinnar sé áhyggjuefni sem þarfnast frekari rannsókna. Við byggjum á sjálfbærri nýtingu vegna þess að okkur ber skylda til þess að skila auðlindinni sterkri til komandi kynslóða. En það er líka mikilvægt í alþjóðlegri markaðssetningu að geta vottað ábyrgar veiðar, því neytendur eru meðvitaðri og gera meiri kröfur en áður. Ég legg einnig áherslu að styrkja hafrannsóknir, ekki síst í ljósi mögulegra breytinga í hafinu umhverfis Ísland, t.d. af völdum loftlagsbreytinga. Við verðum að gera það sem í okkar valdi stendur til þess að bægja þeirri vá frá, en umfram allt þurfum við að skilja hana og möguleg áhrif hennar. Þessar áherslur komu skýrt fram á Hafráðstefnu Sameinuðu Þjóðanna í NY á dögunum.” Segir Þorgerður Katrín Gunnarsdóttir, sjávarútvegs- og landbúnaðarráðherra.  

Í meðfylgjandi töflu má sjá ákvörðun ráðherra um heildaraflamark fyrir einstakar tegundir. Þess ber að geta að aflamark fyrir mikilvæga uppsjávarstofna verður ákveðið á haustmánuðum.

Ákvörðun um leyfilegan heildarafla fiskveiðiárið 2017/2018, tonn: