Norðrið dregur sífellt fleiri að
Guðlaugur Þór Þórðarson utanríkisráðherra gerði þróun mála á norðurslóðum að umtalsefni í ræðu sinni á Hringborði norðurslóða, sem hófst í Edinborg, Skotlandi, í dag. Fór Guðlaugur Þór yfir þær breytingar sem orðið hafa í norðrinu á undanliðnum áratugum sem orðið hafa til bættra lífshátta og aukinnar velmegunar. „Norðrið dregur sífellt fleiri að. Í dag flytur fólk úr suðri til norðurs," sagði Guðlaugur Þór meðal annars í ræðu sinni. Utanríkisráðherra rifjaði einnig upp samskipti Íslands og Skotlands sem standa á gömlum merg og verða sífellt nánari, meðal annars á sviðum menntamála og ferðamennsku. Þá greindi ráðherra stuttlega frá undirbúningi fyrir formennsku Íslands í Norðurskautsráðinu, sem hefst árið 2019.
Utanríkisráðherra átti jafnframt fund með Nicola Sturgeon, fyrsta ráðherra Skotlands, þar sem málefni norðurslóða og Brexit voru til umræðu. „Það er gott að vera Íslendingur í Skotlandi. Skotar hafa ávallt staðið okkur nærri og með tíðari samgöngum aukast tækifæri okkar til að efla samskiptin enn frekar, meðal annars í málefnum norðurslóða en einnig í viðskiptum, ferðamennsku, menntun og vísindum," sagði Guðlaugur Þór Þórðarson.
Efnisorð
Heimsmarkmiðin
