Kynjajafnrétti lykill að sjálfbærri þróun

Guðlaugur Þór Þórðarson, utanríkisráðherra, ávarpaði allsherjarþing Sameinuðu þjóðanna í nýliðinni viku. Mannréttindamál, sjálfbær þróun og stríð í Sýrlandi og Jemen voru á meðal þess sem ráðherra fjallaði um í ræðu sinni.  

Sameinuðu þjóðirnar hafa gegnt stóru hlutverki við að stuðla að friði og framþróun. Flestir lífskjaravísar segja jákvæða sögu – söguna af okkar sameiginlega árangri. Það er saga sem við ættum að segja oftar,“ sagði Guðlaugur Þór í upphafi ræðunnar.

Guðlaugur Þór fór í ræðunni yfir mikilvægi kynjajafnréttis sem væri lykillinn að sjálfbærri þróun. Íslendingar væru reiðubúnir að deila reynslu sinni á þessu sviði með öðrum þjóðum. Þá sagði hann mikilvægt að grípa strax til loftslagsaðgerða líkt og Ísland hyggst gera með nýkynntri loftslagsáætlun. Íslendingar yrðu vitni að örum breytingum á norðurslóðum og annars staðar ógnaði eyðimerkurmyndun lífsgæðum fólks.

„Sjálfbær þróun og málefni hafsins voru reifuð í ræðunni og minnti utanríkisráðherra á formennsku Íslands í Norðurskautsráðinu, sem hefst á næsta ári og mun hafa sjálfbærni að leiðarljósi. Þá kom Guðlaugur Þór inn á smitlausa sjúkdóma í ræðu sinni og lagði áherslu á að betur verði hugað að taugasjúkdómum, þá sérstaklega mænuskaða.

Guðlaugur Þór sagðist stoltur af því að Ísland skuli hafa tekið sæti í mannréttindaráði Sameinuðu þjóðanna á hundrað ára afmæli fullveldisins og sjötíu ára afmæli mannréttindayfirlýsingar Sameinuðu þjóðanna. Vaxandi virðing fyrir mannréttindum frá fullveldi hafi átt stóran þátt í aukinni velsæld þjóðarinnar og því væri það hverju ríki hagsmunamál að tryggja mannréttindi borgaranna. Reifaði Guðlaugur Þór helstu áherslumál Íslands í mannréttindaráðinu, sem lúta meðal annars jafnrétti kynjanna og réttindum barna, réttindum hinsegin fólks og umbótum á starfsháttum mannréttindaráðsins.

Utanríkisráðherra kom inn á átökin í Sýrlandi og Jemen, stöðu mála í Venesúela og Mjanmar og vakti máls á flóttamannavandanum og stöðu barna í því samhengi. Að endingu gerði Guðlaugur Þór grundvallargildi Sameinuðu þjóðanna að umtalsefni og stöðu alþjóðakerfisins, og mikilvægi þess að standa vörð um það.

„Meðal undirstaða okkar sjálfstæðis og velgengni eru reglur alþjóðakerfisins og gildi sem meðal annars lúta að opnum mörkuðum, fríverslun, öflugum alþjóðastofnunum, frjálslyndi og lýðræði og alþjóðlegri samvinnu. Þessari undirstöðu má aldrei taka sem sjálfsögðum hlut og það kemur í okkar hlut, aðildarríkja Sameinuðu þjóðanna, að sjá til þess að kynslóðir framtíðarinnar njóti þessara sömu fríðinda.

Sjá ræðuna á myndbandi hér:

(frá Utanríkisráðuneytinu,mynd:UN Photo/Loey Felipe)

Sjá ræðuna hér.

Fréttin birtist áður á vef Upplýsingaskrifstofu Sameinuðu þjóðanna.