Fríverslunarviðræðum EFTA og Indónesíu lokið
EFTASamningurinn tekur m.a. til vöru- og þjónustuviðskipta, fjárfestinga, opinberra útboða, hugverkaréttinda og sjálfbærrar þróunar. Hann tryggir Íslandi greiðan tollfrjálsan aðgang fyrir nær allar helstu útflutningsafurðir til Indónesíu, þ.m.t. fisk og sjávarafurðir, iðnaðar- og tæknivörur sem og landbúnaðarafurðir. Indónesía er fjórða fjölmennasta ríki heims með um 260 milljónir íbúa.
„Það er fagnaðarefni að viðræðum EFTA og Indónesíu sé nú lokið og undirritun nýs fríverslunarsamnings standi fyrir dyrum. Þessi samningur tryggir íslenskum útflytjendum betri markaðsaðgang að þessu fjölmenna ríki og í honum felast því ýmis tækifæri,“ segir Guðlaugur Þór Þórðarson utanríkisráðherra um niðurstöðuna.
Ákvæði samningsins um þjónustuviðskipti felur meðal annars í sér bætt aðgengi fyrir sérfræðinga á sviði endurnýjanlegrar orku, sér í lagi jarðhita sem er víða að finna í Indónesíu.
Í fyrra nam vöruútflutningur frá Íslandi til Indónesíu um 77 milljónum króna. Mest var flutt út af frystum makríl og loðnu. Á sama tíma nam innflutningur hingað frá Indónesíu rétt tæpum milljarði króna.
Stefnt er að því að samningurinn verði undirritaður fyrir lok árs.