Forsætisráðherra tók við skilaboðum barna úr Flataskóla

Katrín Jakobsdóttir, forsætisráðherra, tók á móti Ævari Þór Benediktssyni sem færði henni skilaboð á loftbelgjum frá börnum úr Flataskóla.

Börnin skrifuðu skilaboð á loftbelgina í fyrra á Alþjóðadegi barna, 20. nóvember, áður en ríkisstjórn Katrínar Jakobsdóttir var mynduð. Nú, ári síðar, heimsótti Ævar forsætisráðherra og afhenti henni skilaboðin á loftbelgjunum. Á þeim eru mikilvæg skilaboð til stjórnvalda á borð við „Öll börn eiga að fá vernd gegn ofbeldi“, „Öll börn eiga að fá að fara í skóla“ og „Öll börn eiga að vera frjáls“.

Katrín afhenti forseta Alþingis loftbelgina og óskaði eftir því að hver þingmaður fengi ein skilaboð til að hafa í huga í dag á Alþjóðadegi barna, sem öðrum dögum.

Verkefnið er liður í Alþjóðadegi barna og UNICEF undir yfirskriftinni „Börn fá orðið“ þar sem þau vekja athygli á tjáningarfrelsi barna og rétt þeirra til þátttöku.