Ísland í öndvegi á Global Positive Forum í París

Katrín Jakobsdóttir forsætisráðherra ávarpaði Global Positive Forum við setningarathöfn ráðstefnunnar í París í dag. Ísland mælist þriðja árið í röð meðal þriggja efstu á Positive Economy Index og er af því tilefni í öndvegi á ráðstefnunni. Auk forsætisráðherra taka Bjarni Benediktsson fjármála- og efnahagsráðherra og Guðmundur Ingi Guðbrandsson umhverfis- og auðlindaráðherra þátt í pallborðsumræðum á ráðstefnunni í dag.

Positive Economy Index mælikvarðinn hefur verið gefinn út frá árinu 2013 og mælir framtíðarhorfur ríkja, ekki aðeins m.t.t. efnahags heldur einnig stefnumótunar, auðlindastjórnunar, velferðar, menntunar, heilbrigðisþjónustu og félagslegra og siðferðilegra gilda.