Embætti skrifstofustjóra á skrifstofu hagmála og fjárlaga laust til umsóknar

Heilbrigðisráðuneytið auglýsir laust til umsóknar embætti skrifstofustjóra á skrifstofu hagmála- og fjárlaga í heilbrigðisráðuneytinu. Auglýsingin var birt á Starfatorgi 8. febrúar síðastliðinn.

Hlutverk skrifstofu hagmála og fjárlaga er að undirbyggja stefnumarkandi ákvarðanir ráðherra og hafa heildasýn yfir fjárreiður stofnana og annarra fjárlagaliða sem heyra undir ráðuneytið. Þá leggur skrifstofan mat á hagkvæmni verkefna og þann kostnað sem kann að lenda á ríkissjóði verði frumvörp að lögum. Í þessu felst m.a. ábyrgð á gerð fjárlagatillagna og rekstrar- og framkvæmdaáætlana og eftirlit með framkvæmd fjárlaga. Þá annast skrifstofan greiningu og úrvinnslu gagna, upplýsingaöflun og framsetningu tölfræðilegra upplýsinga.

Um er að ræða áhugavert og fjölbreytt starf í krefjandi starfsumhverfi þar sem reynir á öguð vinnubrögð, ábyrgð og sjálfstæði. Skipað verður í embættið til fimm ára og æskilegt að umsækjandi geti hafið störf sem fyrst. 

Menntunar- og hæfniskröfur: 

• Háskólamenntun sem nýtist í starfi, framhaldsmenntun æskileg
• Þekking og reynsla á sviði rekstrar og stjórnunar.
• Þekking og reynsla á sviði opinberrar stjórnsýslu.
• Góð tölvukunnátta.
• Metnaður og vilji til að ná árangri.
• Frumkvæði og sjálfstæði í vinnubrögðum ásamt skipulags- og greiningarhæfni.
• Gott vald á íslensku og færni til að tjá sig í ræðu og riti. 
• Góð kunnátta í ensku nauðsynleg og kunnátta í a.m.k. einu Norðurlandamáli æskileg.
• Góð hæfni í mannlegum  samskiptum.

Sérstök hæfnisnefnd, skipuð þremur einstaklingum, mun meta hæfni umsækjenda og skila greinargerð til heilbrigðisráðherra, sem skipar í starfið. Nefndin starfar skv. reglum nr. 393/2012 um ráðgefandi nefndir er meta hæfni umsækjenda um embætti við Stjórnarráð Íslands. Um embættið gilda lög nr. 115/2011 um Stjórnarráð Íslands og lög nr. 70/1996 um réttindi og skyldur starfsmanna ríkisins. Launakjör eru samkvæmt kjarasamningi fjármálaráðherra og Félags háskólamenntaðra starfsmanna stjórnarráðsins.

Upplýsingar um embættið veita Dagný Brynjólfsdóttir skrifstofustjóri og Ólafur Darri Andrason ráðuneytisstjóri í síma 545 8700. Ráðuneytið hvetur karla jafnt sem konur til að sækja um embættið.

Umsóknir ásamt upplýsingum um menntun og fyrri störf skulu berast heilbrigðisráðuneytinu, Skógarhlíð 6, 105 Reykjavík eða í tölvupósti á póstfangið [email protected] eigi síðar en 25.febrúar 2019. Tekið skal fram að umsóknir geta gilt í sex mánuði frá því að umsóknarfrestur rennur út, sbr. reglur nr. 464/1996 um auglýsingar á lausum störfum, með síðari breytingum.

Öllum umsóknum verður svarað þegar ákvörðun um skipun í embættið liggur fyrir.