Norrænir ráðherrar jafnréttismála beita sér fyrir auknum árangri í jafnréttismálum á heimsvísu

Ráðherrar jafnréttismála á Norðurlöndunum undirrituðu í gær viljayfirlýsingu um að leggja áherslu á árangur í jafnréttismálum við innleiðingu Heimsmarkmiða Sameinuðu þjóðanna. Ráðherrarnir afhentu Phumzile Mlambo-Ngcuka framkvæmdastjóra UN Women, yfirlýsinguna í aðdraganda 63. fundar kvennanefndarinnar sem hefst í höfðustöðvum Sameinuðu þjóðanna í dag.

Norðurlöndin hafa náð góðum árangri á sviði jafnréttismála í alþjóðlegum samanburði og vilja beita áhrifum sínum til að árangur náist á alþjóðavettvangi. Þau leggja áherslu á náið samstarf við UN Women vegna endurmats á framkvæmdaáætlun Sameinuðu þjóðanna um málefni kvenna frá árinu 1995, sem fram fer á næsta ári. Hvað endurmat hennar varðar telja Norðurlöndin meðal annars mikilvægt að beina sjónum að aukinni þátttöku karla í öllu jafnréttisstarfi og að róðurinn gegn kynbundnu ofbeldi verði hertur sem krefst bæði kerfislægra breytinga og gagnrýninnar umræðu um kynjahlutverk karla og kvenna.

Jafnrétti á vinnumarkaði grundvallast á jafnri stöðu heima fyrir
Með undirritun viljayfirlýsingarinnar vilja ráðherrar Norðurlandanna hvetja önnur aðildarríki Sameinuðu þjóðanna til aukins samstarfs á alþjóðavettvangi í jafnréttismálum og innleiðingu Heimsmarkmiða Sameinuðu þjóðanna.
Meðal þeirra verkefna sem nýtt verða sem leiðarvísir er sérstakt átaksverkefni forsætisráðherra Norðurlandanna, The Nordic Gender Effect at Work, og öndvegissetur Norrænu ráðherranefndarinnar um norrænar lausnir, sem m.a. hefur beinst að aðgengi að dagvistun, foreldraorlofi, jafnlaunamálum og efnahagslegri valdeflingu kvenna.

Íslenski forsætisráðherrann á fundi kvennanefndar Sameinuðu þjóðanna
„Jöfn staða kvenna og karla heima fyrir er forsenda jafnréttis á vinnumarkaði og það skiptir öllu máli að átta sig á samhenginu þar á milli,“ segir Katrín Jakobsdóttir, forsætisráðherra og ráðherra jafnréttismála, sem fer fyrir sendinefnd Íslands á fundi kvennanefndar Sameinuðu þjóðanna sem hefst í dag í New York.

Raunveruleg áhrif
Á lista Alþjóðaefnahagsráðsins yfir ríki þar sem kynjajafnrétti mælist mest hefur Ísland verið í efsta sæti síðastliðin tíu ár og fylgja hin Norðurlöndin þar fast á eftir. Úttekt Alþjóðaefnahagsráðsins nær til allflestra landa og leggur mat á jafnrétti kynjanna í stjórnmálum, menntun, atvinnu og heilbrigði. Framfarir í jafnréttismálum eru hins vegar mjög hægar á heimsvísu og benda niðurstöður rannsókna til að það geti tekið marga áratugi að ná fullu jafnrétti karla og kvenna um heim allan og að afar fá ríki muni fyrir árið 2030 ná markmiði um að jafnrétti kynjanna verði tryggt og völd allra kvenna og stúlkna efld.

MeToo afhjúpaði áskoranir í jafnréttismálum
Ráðherrar Norðurlandanna leggja mikla áherslu á að #MeToo-hreyfingin verði til þess að sýna fram á að enn er mikið svigrúm til að gera betur í jafnréttismálum, bæði á Norðurlöndunum og um heim allan.

Jafnrétti er mögulegt!
Phumzile Mlambo-Ngcuka, framkvæmdastjóri UN Women, sagði Norðurlöndin vera mikilvæga fyrirmynd hvað varðar árangur í jafnréttismálum og að þau væru í lykilstöðu til að sýna heimsbyggðinni að raunhæft sé að ná jafnrétti kvenna og karla að fullu fyrir árið 2030.
„Mig langar að Norðurlöndin sýni heiminum að jafnrétti og valdefling kvenna er markmið sem mögulegt er að ná,“ sagði Phumzile Mlambo-Ngcuka á fundi sínum með ráðherrunum í dag.

Viljayfirlýsing ráðherra jafnréttismála á Norðurlöndunum