Félags- og barnamálaráðherra fundaði með félagsmálastjórum af öllu landinu

Ásmundur Einar Daðason, félags- og barnamálaráðherra, átti fund með félagsmálastjórum allra sveitarfélaga landsins í Skagafirði í dag. Þar var farið ítarlega yfir vinnu er varðar málefni barna sem fer fram í félagsmálaráðuneytinu um þessar mundir, en hún snýr meðal annars að heildarendurskoðun barnaverndarlaga og endurskoðun á félagslegri umgjörð og stuðningi við börn á Íslandi.

„Þeir sem vinna í nærumhverfi barna eru ómissandi samstarfsaðilar í slíkri vinnu og afar mikilvægt að eiga við þá milliliðalaust samtal. Þessi reynslumikli hópur lagði eins og við var að búast mikið til málanna og var ánægjulegt að skynja viljann til breytinga,“ segir Ásmundur Einar.