Ásta Magnúsdóttir sem gegnt hefur embætti ráðuneytisstjóra mennta- og menningarmálaráðuneytis fer brátt til starfa í höfuðstöðvum Menningarmálastofnunar Sameinuðu þjóðanna (e. UNESCO) í París. Ásta mun starfa á skrifstofu UNESCO er sinnir stefnumótandi áætlanagerð og halda utan um verkefni sem tengjast alþjóðlegum miðstöðvum og stofnunum er starfa undir formerkjum UNESCO. Einnig mun Ásta skipa lykilstöðu innan stofnunarinnar í undirbúningi nýrrar stefnu UNESCO fyrir árin 2022-2029, þar sem heimsmarkmiðin verða í fyrirrúmi, og sinna verkefnum sem falla undir nýjan rammasamning Íslands og UNESCO.
Ásta hefur gengt embætti ráðuneytisstjóra frá árinu 2009. Hún starfaði áður sem skrifstofustjóri hjá Fríverslunarsamtökum Evrópu (e. EFTA) í Brussel og sem sérfræðingur á sviði umhverfismála hjá Eftirlitsstofnun EFTA.
.jpg)