Norræn jazzhátíð í Washington DC

Laugardaginn 22. júní var jazzhátíðin Nordic Jazz haldin í þrettánda skipti í Washington DC. Bassaleikarinn og tónskáldið Sigmar Þór Matthíasson með kvartett sínum var fulltrúi Íslands á hátíðinni.

Nordic Jazz er samstarfsverkefni sendiráða Norðurlandanna í Washington. Að þessu sinni var hátíðin haldin í garði danska sendiráðsins og yfir daginn komu fram tónlistarmenn frá öllum Norðurlöndunum. Uppselt var á viðburðinn sem stóð í fimm klukkutíma. Boðið var upp á þétta dagskrá af lifandi jazz-tónlistarflutningi og veitingar frá Norðurlöndunum. Veðrið var með besta móti sem gerði daginn enn ánægjulegri.

Sigmar Þór Matthíasson spilaði verk af fyrstu sóló plötu sinni, ÁRÓRA, sem kom út í September 2018 og hlaut tvennar tilnefningar til Íslensku Tónlistaverðlaunanna í flokki jazz- og blústónlistar.