Ísland undirritar stuðningsyfirlýsingu um náttúruna

Guðmundur Ingi Guðbrandsson, umhverfis- og auðlindaráðherra, gerði vernd og endurheimt vistkerfa að umtalsefni í ávarpi sínu á fundi um líffræðilegan fjölbreytileika sem haldinn var í gær í  tengslum við 75. Allsherjarþing Sameinuðu þjóðanna sem nú stendur yfir. Ísland var í hópi yfir 70 ríkja sem skrifuðu undir stuðningsyfirlýsingu í aðdraganda Allsherjarþingsins, þar sem ríkin hétu því að auka metnað í loftslagsmálum, stuðla að sjálfbærum neyslu- og framleiðsluháttum og hafa loftslag, umhverfi og líffræðilega fjölbreytni að leiðarljósi við uppbyggingu í kjölfar COVID-19 faraldursins.

Vegna heimsfaraldursins sækja íslenskir ráðamenn ekki þingið í New York að þessu sinni. Ávarp Guðmundar Inga á fundinum í dag var því flutt af myndbandi um miðnætti í nótt að íslenskum tíma.

Guðmundur Ingi benti á nauðsyn líffræðilegs fjölbreytileika við að tryggja sjálfbærni og draga úr áhrifum loftslagsbreytinga. „Þær kerfislægu og áður óþekktu breytingar sem nú eiga sér stað á Norðurskautinu og öðrum viðkvæmum svæðum víða um heim kalla á að það verði strax gripið til frekari aðgerða,“ sagði Guðmundur Ingi í ávarpi sínu.

Þá sagði hann vernd gegn framandi ágengum tegundum og endurheimt skóglendis, votlendis og annarra mikilvægra vistkerfa eiga að vera ofarlega á dagskrá. „Íslensk stjórnvöld hafa lagt áherslu á samlegðaráhrif þessa í aðgerðaáætlun sinni í loftslagsmálum. Ein grunnstoða hennar er endurheimt skóga og votlendis og að vinna þannig gegn landeyðingu og loftslagsbreytingum með náttúrumiðuðum lausnum sem líka stuðla að endurheimt líffræðilegs fjölbreytileika.“

Í stefnuyfirlýsingu ríkisstjórnarinnar er kveðið á um stofnun þjóðgarðs á miðhálendi Íslands. Á miðhálendinu eru ein stærstu óbyggðu víðerni Evrópu. Guðmundur Ingi greindi í ávarpi sínu frá því að vinna við undirbúning stofnunar hans væri nú í fullum gangi. „Öræfin ná yfir þriðjung landsins og verða stærsti þjóðgarður í Evrópu og jafnframt stærsta framlag Íslands til náttúruverndar hingað til.“