Fréttaannáll forsætisráðuneytisins 2020
Viðureignin við heimsfaraldur kórónuveiru var stærsta verkefni forsætisráðuneytisins á liðnu ári. Samhæfingarhlutverk ráðuneytisins í margþættu viðbragði stjórnvalda við faraldrinum varð viðameira en nokkur gat séð fyrir. Ákvarðanir og aðgerðir vegna faraldursins gætu vel fyllt sérstakan annáll.
Samhliða þessu stóra verkefni fóru fram hundruð viðtala forsætisráðherra við fjölmiðla heima og erlendis en allir stærstu miðlar heims hafa fjallað um viðureign Íslands við veiruna því árangur Íslands hefur vakið athygli víða. Viðamikil samskipti forsætisráðherra við þjóðarleiðtoga og ríkisstjórnir annarra ríkja og ríkjasambanda hafa að stærstum hluta verið rafræn og ljóst að slík fundarhöld munu í framhaldinu verða algengari.
Alþingi samþykkti frumvörp forsætisráðherra um vernd uppljóstrara sem eru fyrstu heildarlögin á því sviði, einnig heildarlög um varnir gegn hagsmunaárekstrum, ný jafnréttislög voru samþykkt og réttindi trans og intersex fólks og barna sem fæðast með ódæmigerð kyneinkenni fóru líka í gegnum þingið. En hér eru stærstu fréttirnar frá forsætisráðuneytinu í fyrra.